الليستة التامنة: أفلام الباد بويز

Mirna El Mahdy
Jun 23, 2019
3 min read

الكلبوبات اللى بيكرشوا على الباد بويز يجمعوا هنا عشان الليستة دى على ذوقكم.

1) Grease:

لما نقول باد بوى يبقى بنتكلم عن داني اللى بيلعب دوره جون ترافولتا في الفيلم Grease اللى تم إنتاجه سنة 1978.

ممكن يبقى بالنسبة لكم فيلم قديم بس هو اللى حط تعريف الباد بوى في الـhighschool وستايل الجاكت الجلد والشعر اللى بيلمع والغمازات والجل والموتوسيكلات ورقص الديسكو.

القصة عن ساندي أولسن البنت البريئة اللى بتقع فى حب داني فى فترة الصيف اللى شايف أن الحب لعبة ومجرد تسلية لتمضية الأجازة وبينتهى مع بداية الدراسة إلى أن يفاجئ داني أن ساندي هتتنقل لمدرسته ضمن برنامج تبادل طلابي، فيا ترى العلاقة هتاخد أنهى منحنى؟

2) John Tucker Must Die:

جون تاكر لاعب الباسكت السيكسى اللى البنات كلهم بيموتوا عليه وأشهر الشباب فى الhighschool مرتبط بتلات بنات من ورا بعض، بتشاء الأقدار أن البنات التلاتة يعرفوا أن جون تاكر بيلعب بيهم فبيقرروا بينتقموا منه بمساعدة "كيت" اللى بترسم لهم خطة الانتقام المثالية لكن الأحداث بتتغير وبتلاقي "كيت" نفسها وقعت فى حب جون، وهنا تتغير الموازين.

3) The Ugly Truth:

خبير العلاقات العاطفية المشهور بنصايحه العاطفية بأنه بيعامل المرأة على أنها كائن غبي ومصدر للشهوات مش أكتر، بيمضي عقد لبرنامج تلفزيوني جديد، المعدة بتاعته ست Feminist من نوعية الـStrong Independent Woman حياتها كلها الشغل بدون أى علاقات عاطفية تذكر ولكن بشغلهم سوا بيبدأوا يكملوا بعض وبيساعدها توقع الكراش بتاعها فى حبها ولكن مش هى دي النهاية...

4) 10 Things I Hate About You:

من قواعد عائلة ستريدفورد هو أن البنت البكرية لازم ترتبط الأول عشان يسمحوا لبيانكا (الأخت الصغيرة) أنها ترتبط ولكن المعضلة هى أن كيت (الأخت البكرية) دماغها فى الشعر والفلسفة والمذاكرة وبتحتقر معظم الشباب اللى معاها فى المدرسة إلى أن تقابل باتريك فيرونا المعروف بأنه الباد بوي بتاع المدرسة ويبدأ يغير تفكيرها عن شوية حاجات فى الحياة إلى أن تكتشف سره اللى هيغير علاقتهم ببعض تماماً.

5) Ghosts of Girlfriends Past:

كونور هو التعريف الحي للباد بوى فى الليستة دى، بعد وفاة أهله، عمه رباه على فلسفة أن الستات والارتباط الرسمي هم مصدر تعاسة لأى إنسان وعلمه يعيش حياته على العلاقات العابرة اللى ماتتخطاش ليلة إلى أن يجي ميعاد فرح أخوه ويلاقي كونور أن ماضيه بيطارده وتحصل أحداث تغير تفكيره وفلسفته اللى أتربى عليها 180 درجة.

6) Crazy, Stupid Love:

الفيلم فيه أكتر من قصة وشخصية وهو بطولة جماعية بس الخط بتاع "جيكوب بالمر" اللى بيقوم بدوره رايان جوزلينج هو اللى كله عن الباد بويز.

جيكوب بيقوم بدور الأب الروحي لكال اللى لسة خارج من صدمة عاطفية وبيبدأ يعلمه أزاى يوقع البنات فى حبه وبيعلمه نظرته الدنيوية ليهم لحد ما طبعاً زى كل الأفلام اللى فاتت هيقع على بوزه فى غرام واحدة تغير شخصيته وأفكاره تماماً.

7) It's a boy girl thing:

وودي لاعب الأمريكان فووتبول وبطل المدرسة السيكسي اللى كل البنات بتتمناه يبقى جار نيل البنت الدحيحة البريئة اللى ماورهاش غير المذاكرة.

بيروحوا مع المدرسة رحلة للمتحف وبيقفوا قدام تمثال من حضارة الإنكا فتقع عليهم التعويذة ونيل بتتدخل فى جسم وودي وتبقى ولد وهو بيدخل جسمها ويبقى بنت.

الفيلم كوميدى جداً وأحداثه رومانسية وشخصية وودي فعلاً باد بوى قمر.

8) Win a Date with Tad Hamilton:

روزالي بتدخل مسابقة وبتكسب موعد غرامي مع ممثلها المفضل تاد هامليتون اللى معروف بأدواره الرومانسية المثالية اللى بيطلع فيها مخلص ووفي لكن اللى روزالي ماتعرفهوش هو أن تاد ممثل مقضيها مع معجباته اللى زى الرز وأن الملاك اللى بيطلع فى التليفزيون ده مش أكتر من باد بوى محترف.

9) Step Up:

ميكس جميل بين الرومانسية والاستعراضات والرقص والموسيقى.

تايلور شاب بيحب المشاكل وعصبي وكان هيدخل السجن أكتر من مرة بسبب سلوكه العنيف وميوله الإجرامية بس شغفه للرقص بيجمعه بنورا الباليرينا الرقيقة المجتهدة وبتبدأ تغير سلوكه وشخصيته والباد بوي بيتحول لحمل وديع، بس هى دى النهاية؟

ملحوظة: أبطال الفيلم ده (تشانينج تيتيم وجنا دوين) حبوا بعض فى الفيلم ده وأتجوزوا بعده.

10) Save the Last Dance:

يشبه Step Up فى حاجات كتير من حيث الميكس بين الاستعراضات والرومانسية بس الفيلم ده على مستوى أعمق بكتير وبيناقش قضايا العنصرية بين الأمريكان الأفارقة والبيض بس سيبكم من العمق ده وخلونا فى ديريك الباد بوى بتاعنا اللى عايش في شيكاجو وعنده سجل إجرامي حافل إلى أن تنتقل للحى الباليرينا سارة بعد صدمة وفاة والدتها وبيبدأ كل حد فيهم يأثر فى حياة التاني ويغير شخصيته وحياته.

11) The DUFF:

ويزلي مراهق وسيم، دمه خفيف، رياضي وسيكسي وكان مرتبط بأشهر بنت فى المدرسة ولكن الظروف بتتغير وبيحتاج مساعدة صديقة طفولته بيانكا عشان يخلي صاحبته القديمة تغير عليه وترجع له تاني بس الميكس الجميل بين شخصيتين بيانكا وويزلي هيأدى لمواقف كتير مضحكة وهتنتهى نهايات غير متوقعة.