!الليستة الخامسة: أفلام عظيمة

موسم المسلسلات خلص، ورجعنا للأفلام تاني.

دي ليستة بالأفلام الأقرب لقلبي اللى غيرت مفهومي عن حاجات كتير في الحياة.

---

1) 12 angry men (1957):

الفيلم عن 12 قاضي من أعمار وخلفيات اجتماعية ودينية مختلفة، بيناقشوا الحكم على قضية مراهق قتل أبوه وما بين مؤيد ومعارض لبراءته، بتسمع تحليلات بتعكس طبيعة النفس البشرية واختلافها من بيئة لبيئة.

الفيلم أكتر من رائع والسيناريو والحوار محبوكين بالشعرة والعظيم فيه أنه كله متصور فى لوكيشين واحد ومختار لحظة واحدة وده اللى بيعكس عظمته اللي لسة عايشة لحد النهاردة.

2) Amadeus (1984):

من أعظم الأفلام اللى أتعملت فى التمانينات وكانت مثيرة للجدل لحد النهاردة.

بتدور القصة عن الملحن والموسيقارأنطونيو ساليري اللى كان متميز ويعتبر أحسن موسيقار فى فيينا إلى أن ظهر موزارت وخطف منه كل الأضواء وبنبدأ نتابع الحسد والكره فى قلب ساليري تجاه موزارت إلى هيقوده لأفعال بشعة.

الفيلم مش بس بيتكلم عن الموسيقى وبيتناول المنافسة بين ساليري وموزارت، الفيلم بيناقش الإيمان بالقدر وبربنا وبالموهبة والحياة بشكل فلسفي هيغير نظرتك للحياة.

3) Mother (2017):

عشان تتفرج على الفيلم ده لازم تشوفه بشكل فلسفي بعيداً عن أى اعتقادات دينية (أنا حذرتك أهو).

الفيلم بيعتمد على الرمزية البحتة اللى هتخليك تركز فى كل لقطة كويس عشان تفهم تفاصيلها.

القصة بتتناول التاريخ البشرى منذ خلق سيدنا آدم مروراً بولادة قابيل وهابيل والحروب العالمية الأولى والتانية ولحد الربيع العربي وكل الأحداث البشرية الدموية فى شكل بيظهر قد أيه الجنس البشرى أفسد الأرض وخربها وحقيقي هتغير رأيك فى النسل البشري كله بعد الفيلم ده.

4) The Shawshank Redemption (1994):

بتدور حبكة الفيلم من فترة الأربيعنات ولحد الستينيات وهو مقتبس عى قصة قصيرة للعالمي ستيفن كينج.

القصة عن آندي دوفرنس اللى فشل فى اثبات براءته فى تهمة قتل مراته بدافع الخيانة وأتحكم عليه بالسجن لمدى الحياة فى سجن الشاوشانك اللي هو من أقسى وأسوأ السجون الأمريكية وبنتابع البطل فى رحلته القاسية فى السجن ومحاولاته للتأقلم وإثبات براءته وصحوبيته على ريد والتأثير والتغيير الجذري اللى عقل وفكر وثقافة آندي هيعملوه فى السجن بس فى النهاية هنكتشف كلنا أننا متغفلين وأن دماغ آندي بتخطط لحاجة تانية خالص.

5) Léon: The Professional (1994):

تم تصنيفه كواحد من أفضل 100 فيلم فى تاريخ السينما.

القصة بتدور عن ماتيلدا المراهقة اللى بتعاني من العنف المنزلي من أبوها ومراته وعن جارها ليون اللى بيعاملها بعطف إلى أن تتشقلب الظروف والمواقف وتكتشف ماتيلدا أن جارهم الوحيد اللى بيعاملها كويس هو قاتل مأجور.

وبتبدأ سلسلة من الأحداث المثيرة اللى بتربط بين البطلين إلى أن تنتهى نهاية مأساوية.

6) One flew over the cuckoo's nest (1975):

فيلم فيه جاك نيكلسون، إذاً هو فيلم عظيم!

القصة عن النصاب راندل باتريك ماكمفري اللى بيدعى الجنون فبيتم نقله لمستشفى الأمراض العقلية لتقييم وتحديد إن كان هيقضى عقوبته فى المستشفى ولا فى السجن على أساس أنه كدة بيخفف على نفسه العقوبة، بس اللى ماكانش عامل حسابه أنه بيرمى نفسه فى التهلكة وبيمضى شهادة وفاته بإيده لأن اللى هيشوفه فى المستشفى لا يمكن يخطر على بال حد.

تم اقتباس العمل ده في مصر وأتعمل مسلسل بطولة عادل إمام اسمه "أحلام الفتى الطائر".

7) Clockwork orange (1971):

فيلم إنجليزى فلسفي عن الطبيعة البشرية فى إطار كوميدي أكشن وهيعلمك حاجات كتير عن الطبيعة الإنسانية والأمراض النفسية والميول العنيفة وتأثيرها فى المجتمع.

القصة بتدور عن أليكس وصحابه اللى عندهم ميول سيكوباتية عنيفة ومقضين وقتهم فى أذية الناس بكل الأشكال الممكنة لحد ما بيتم اتهامه فى قضية قتل وبيتحول للمصحة النفسية وهناك هيطبقوا عليه نظرية علمية جديدة الغرض منها تحويله لإنسان مسالم بالكامل مسلوب من أى ميول عنيفة مهما كانت دوافعه فتبدأ سلسلة من الأحداث والمواقف اللى عمر ما أليكس كان يتوقعها.

8) Relatos Salvajes (2014):

فيلم أرجنتينى واسمه بالإنجليش Wild Tales.

الفيلم عبقري وفريد من نوعه لأنه عبارة عن 6 أفلام قصيرة متجمعة فى فيلم روائي طويل وبيتناول موضوع واحد...الغضب!

مش هقدر أقول أكتر من كدة بس بجد الفيلم ده ماينفعش يتفوت ولازم تتفرجوا عليه وتركزوا فى كل تفصيلة لأنه حقيقي هيعلمك تمسك أعصابك وماتغضبش زى أبطال القصص الستة عشان مايبقاش مصيرك زيهم.

9) Le fabuleux destin d'Amélie Poulain (2001):

فيلم فرنساوى أترشح لخمس جوايز أوسكار.

القصة عن شابة باريسية اسمها إيميلي عندها القدرة تشوف الجمال والأمل فى كل شئ، وبتكرس حياتها أنها تساعد الناس وتحسن حياتهم وتجملها من غير ما يعرفوا أنها بتعمل ده.

بعد ما تتفرج على الفيلم هتبقى حاسس إنك طاير من كتر الإيجابية والجمال اللى فيه.

10) A good year (2006):

فيلم إنجليزى/فرنساوى من نفس فئة فيلم Amélie Poulain كدة بردو كله إيجابية وسعادة.

القصة عن ماكس سكينر اللي حياته فى لندن كموظف مهم فى أحدى البنوك نسته القيمة المعنوية والجمالية لكل حاجة فى الحياة وخلته يركز فى الفلوس والمكسب المادي وبس إلى أن يموت عمه اللى رباه بعد وفاة أهله وبيضطر يسافر فرنسا عشان يتم أجراءات ورث مزرعة العنب اللى أتربى فيها ومن هنا بتبدأ أحداث تغير نظرة ماكس للحياة وبتخليه يعيد ترتيب أولوياته.

11) Wonder (2017):

فيلم مبهج زى الفيلمين اللى قبله إن لم يكن أكتر.

القصة بتدور عن الطفل أوجست بولمان اللى أتولد بتشوهات خلقية بتسبب أنه يتعرض للتنمر من زمايله فى المدرسة ولكن بدعم أسرته ومدرسينه وأصحابه المقربين هيقدر يتخطى الأزمة دى.

الرسالة الأساسية من الفيلم هو الرفق بالآخرين والتعامل برحمة وعطف ولكن بشكل ذكى جداً بعيداً عن الصعبنيات والاستفزاز العاطفي.

الفيلم أكتر من رائع وهو مبنى على رواية bestseller بنفس العنوان ومافيش حد شاف الفيلم إلا لما عيط من الحزن والفرحة فى نفس الوقت.

12) Whiplash (2014):

خد 3 أوسكارز وواحدة جولدن جلوبز ده غير جوايز تانية كتير.

الفيلم عن أندرو نيمان، مراهق مليان إصرار وشغف طموحه أنه يبقى أشهر درامر جاز ويوصل للعالمية ولكنه من أسرة متوسطة تكاد تكون منعدمة الطموح وبتفه من أحلامه وسعيه ورا الموسيقى بس لما يحقق حلمه ويدخل أكاديمية الموسيقى بيبدأ يعتقد أنه خلاص حلمه هيتحقق بسهولة ولكنه ماكانش مدرك أن مُدّرِسه تيرينس فليتشر هيحول حياته لجحيم.

بعد الفرجة على الفيلم ده، هيبقى عندك إصرار وطاقة على تحقيق أحلامك أياً كانت بزدعم الناس أو بدونه ده غير أن الميوزيك والـSoundtracks فيه يهبلوا.

13) La môme (2007):

فيلم فرنساوى بطولة العبقرية ماريون كوتيار.

لو بتحب الفرنش ميوزيك فأكيد سمعت عن إيديت بياف اللى غنت La vie en rose.

الفيلم بيتناول قصة حياتها من أول ولادتها فى حى فقير وبيت الدعارة اللى أتربت فيه مروراً بشغلها كشحاتة فى الشوارع ثم مغنية فى البارات لحد ما وصلت لكونها الأيقونة العالمية إيديت بياف ولحد وفاتها.

الفيلم فيه روحانيات حلوة جداً وبيحكي قصة صعود قوية وفوق كل ده أنا أصلاً بعشق إيديت بياف والميوزيك والـsoundtracks فيه حاجة عظمة العظمة.

14) The Green Book (2018):

ماهرشالا علي خد أوسكار على دوره فى الفيلم ده مع إنى شايفة أن مورتنسن كان أولى بيها بس عامة التمثيل فى الفيلم ده عبقرى.

الفيلم بيتناول العنصرية ضد الأمريكان الأفارقة فى فترة الستينيات ولكن بطريقة مش دموية ولا مؤذية زي باقي الأفلام اللى من النوعية دى.

قصته بتدور عن عازف بيانو من أصول أفريقية عنده جولة موسيقية هتخليه يلف معظم الولايات الأمريكية ولأنه هيروح الجنوب اللى هي أكتر منطقة عنصرية فى التوقيت ده، هيضطر يستعين بسواق من أصول إيطالية عشان يحميه من أى حد يتهجم وهنا بتنشأ ما بينهم صداقة قوية بتوضح الفروق بين الطبقات الاجتماعية فى التوقيت ده.

الفيلم نهايته مبهجة جداً وهو مبنى عن قصة حقيقية.

15) The fight club (1999):

أيقونة الـPlot twists.

الفيلم عن موظف بيعيش حياة يومية مملة وسخيفة بتؤدي لإصابته بالأرق والاكتئاب، الظروف بتخليه يقابل دوردن اللى فلسفته وفكره هتغير حياته وتخليه ينشأ منظمة رجالية سرية هتقلب حياة البطل للأبد وأول ما تحس إنك خلاص فهمت الفيلم، هوبا دابل كيك هتلبس حتة plot twist مهما كنت صايع، استحالة تخمنها.

16) Birdman: The unexpected virtue of ignorance (2014):

فيلم إيقاعه وإخراجه وأداء الممثلين كسبته أوسكار أفضل فيلم عن جدارة.

القصة عن ريجان طومسون اللى بيقرر يرجع لمجال التمثيل بعد فترة غياب طويلة فبيكتب وبيخرج أول مسرحية وبيلعب فيها دور البطل بغرض أنه يلفت أنظار المنتجين والمخرجين ليه.

الفيلم مش بس بيناقش أزمة صناعة السينما اللى بيعاني منها الجيل الحالي بكل ما تحمله من كدب ونفاق، الفيلم بيناقش أزمة نفسية داخلية بيواجهها البطل والمرض النفسي اللي بيعاني منه اللى بيخليه يقوم بتصرفات ماحدش يتوقعها فينتهى الفيلم نهاية صادمة.

ملحوظة: إيما ستون فى الفيلم ده تفوقت على نفسها وتمكنها من الدور هيوصلك لمرحلة إنك تنسى أصلاً أنها إيما ستون وتفضل مقتنع أنها سام وبس.

17) The Book Thief (2013):

هو فيلم عظيم بس نهايته كئيبة جداً (اللهم قد بلغت أهو).

قصته عن ألمانيا فى فترة الحرب النازية وعن بنت أهلها شيوعيين فأضطروا يعرضوها للتبنى عشان مايبقاش مصيرها نفس مصيرهم فيتبناها راجل بيعشق القراية وبتبدأ تغرق فى عالم الكتب بينما العالم فى حرب عنفية حواليها.

الفكرة الأساسية فى الفيلم هى الموت ولكن من زواية مختلفة.

18) Collateral Beauty (2016):

مدير شركة تسويق مهمة فى نيويورك بيتعرض لمأساة كبيرة بتخليه يفقد معنى الحياة فبيقرر أصحابه يخرجوه من محنته ولكنه بيرفض تماماً فبيضطروا يلجأوا لحيلة عشان يسترجعوا صاحبهم بس السحر بينقلب على الساحر وبيتكشفوا أن هم نفسهم اللى محتاجين المساعدة أكتر منه.

القصة عبقرية بتتكلم عن عناصر الحياة التلاتة: الحب، الزمن والموت فى شكل هيخليك تعيد ترتيب أولوياتك فى الحياة.

19) The pursuit of happyness (2006):

مبنى عن قصة حقيقية عن الأب الأعزب كريس جاردنر اللى بيتعرض لأزمة مالية شديدة بتخليه يضطر ينام هو وابنه فى الشوارع وبيوت الإيواء ولكن بإصرار كريس على النجاح وتخطي الأزمة وتوفير حياة أفضل لابنه، مافيش حاجة هتقف فى طريقه.

بعد ما تتفرج على الفيلم ده هتتأكد أنه مع الإصرار والتصميم مافيش مستحيل.

20) The departed (2006):

للى بيحب البوليسي، الفيلم ده عبقري.

القصة بتبدأ باتنين ظباط دخلوا أكاديمية الشرطة، كولين سوليفان (مات ديمون) وبيلي كوستيجان (ليونارديو ديكابريو) وكل واحد فيهم جَى من خلفية مختلفة تماماً بس مش ده المهم، المهم أن كل واحد قرر يبقى ظابط لهدف مختلف ومن هنا بتبدأ الحبكة تاخد طابع الأكشن والسسبنس بشكل يخليك تلف حوالين نفسك لأن كل مشهد هيوترك أكتر من اللى قبله والأهم أن اللى أعلى من الـPlot Twist الغير متوقعة فى الفيلم ده هو نهايته الغير تقليدية بالمرة.

21) Shutter Island (2010):

من أعظم أفلام ديكابريو ونهايته مفتوحة لتخمينك الشخصي.

القصة عن المارشيل تيدي دانيلز اللي بيبدأ يشتغل فى قضايا جنائية بعد ما أنهى خدمته فى الجيش أثناء الحرب العالمية التانية فبيحقق في قضية هروب قاتلة مختلة عقلياً من مستشفى آشكليف للأمراض العقلية بمساعدة زميله الجديد فى العمل.

بمجرد دخوله المستشفى بتبدأ سلسلة من الأحداث الخطيرة اللى بتكشف له أن طاقم الأطباء والعلماء فى المستشفى دي بيجروا تجارب بشعة على المرضى ولكن السؤال اللى هيفضل يطاردك طول ما بتتفرج على الفيلم، هل كل اللى بيحصل حوالين تيدي ده حقيقي ولا نسج خياله بسبب الضغوطات والمآسي اللى أتعرض لها أثناء وبعد الحرب؟

---

لو عندك أى ترشيحات لأفلام عظيمة ومؤثرة ما تبخلش بيهم علية وأكتبهم فى كومنت.

#ليستة_ميرنا 5