الليستة التالتة: مسلسلات تخلصها فى قعدة
- Mirna El Mahdy
- May 29, 2019
- 2 min read
الليستة دى للى خلقهم ضيق ومالهمش فى متابعة المسلسلات الطويلة اللى مواسمها بتمتد إلى ما لا نهاية.
دى ترشيحات لـ18مسلسل تقدر تخلصهم فى قعدة.
1) Alice in Wonderland:
مسلسل من حلقتين وهو إعادة سرد لقصة أليس فى بلاد العجائب بس بشكل عصري ومودرن وبيركز على الفساد اللي بنعيشه.
2) And then there were none
لو بتحب أجاثا كريستى هتحب المسلسل ده خصوصاً لأنه 3 حلقات بس ومش هتقدر ترمش غير لما تخلصهم ومش هتقدر تخمن النهاية الغير متوقعة بالمرة.
3) Lost in Austen:
لو حبيتوا فيلم "Pride and Prejudice" هيعجبكم المسلسل ده. 4 حلقات من الرومانسية وهو إعادة إحياء للرواية بس بشكل مختلف وأحداث جديدة تناسب عصرنا الحالي وبشكل محبوك ومميز.
4) Evil Genius:
مسلسل من 4 حلقات عن أبشع عملية سطو مسلحة حصلت فى التاريخ الأمريكي خططت له ست دماغها شيطانية خلت السطو ينتهى بشكل شنيع وغير متوقع.
5) Ted Bundy (Conversations with a Killer):
مسلسل من 4 حلقات له طابع وثائقي عن أشهر سفاح نساء فى أمريكا "تيد باندي" وتفاصيل جرايمه اللى هتخليك تتنح من كتر غرابتها.
6) The Night of:
لو بتحب البوليسي، المسلسل ده ليك ببدايته القوية وأحداثه المعقدة والحلو أنه من 6 حلقات بس.
7) War and Peace:
مسلسل من 6 حلقات عن خمس أسرات أرستقراطية روسية بعد فترة غزو نابليون وفيه كل العناصر اللى بنحبها، الرومانسية، الدراما، الحرب والسياسية وحتى الكوميديا وهو مستوحى من رواية بنفس الاسم.
8) Millennium:
لو حبيت فيلم "the girl with the dragon tattoo" يبقي هتحب المسلسل ده لأنه إعادة إحياء للرواية من خلال مسلسل قصير من 6 حلقات.
9) The Game:
مسلسل جاسوسي من 6 حلقات بطله جاسوس بريطاني فى فترة الحرب الباردة والأحداث هتخليك واقف على طراطيف صوابعك مستنى تشوف هيوصلوا لأيه.
10) Political animals:
6 حلقات خيالية عن السيدة الأولى الأمريكية السابقة اللى تولت منصب الأمين العام فى خليط مميز بين السياسة والكوميديا وحاجة كدة كلها سترونج إنديبندنت وومان.
11) Alias Grace:
لو حبيت "The Handmaid's tales" هيجعبك المسلسل ده لأنه مستوحى من رواية تانية لنفس الكاتبة اللى بتدور أحداثه حول جريمة قتل حقيقية حصلت فى القرن التاسع عشر والخط الروائي فيه عبقري. المسلسل من 6 حلقات بس.
12) Fearless:
المحاميين يجمعوا! مسلسل من 6 حلقات بطولة "هيلين ماكوري" اللى دورها جننا فى "Peaky Blinders" بتلعب دور حقوقية مهتمة بقضايا حقوق الإنسان وكالعادة طبعاً بتقوم بدور الـbadass كما يقول الكتاب.
13) The Keepers:
مسلسل من 7 حلقات مبنى على قصة حقيقية عن مقتل راهبة فى فترة الستينات وعن حل القضية دى بعد مقتلها بتلاتين سنة ومن خلال التحقيقات بنكتشف قضايا وأسرار فساد الكنيسة الكاثولوكية الأمريكية.
14) Jonathan Strange and Mr. Norrell:
اللى بيحبوا الفاتنازيا يجمعوا هنا! 7 حلقات من الخيال والسحر والمعارك التاريخية اللى هيدخلوا فيها عنصر الفانتازيا بشكل مبدع جداً.
15) Godless
لمحبين الـwesterns ده مسلسل من 7 حلقات يجنن، عن عصابة من الخارجين عن القانون قرروا يدخلوا مدينة كلها ستات على أساس أنها هتبقى لقمة سهلة يقدروا ينهبوها بسرعة، وده لأنهم ماكانوش عارفين أيه اللى مستنيهم هناك.
16) Russian doll:
استكمالاً لمسلسلات الـstrong independent women المسلسل ده من 8 حلقات وموضوعه عن الحياة والموت وأقرب ما يكون لفيلم "ألف مبروك" والبطلة فيه تمثيلها حلو جداً.
17) The traffickers:
8 حلقات عن تجارة كل ما هو غير قانوني من تجارة أعضاء وسلاح ومخدرات وبيتناول الحكاية من كذا زاوية ومنظور مختلف.
18) Band of Brothers:
10 حلقات بدور حول الفرقة العسكرية 101 من أول تدريبهم وبداية معرفتهم ببعض مروراً بمعاركهم فى الحرب العالمية التانية وكل القصص الحقيقية اللى شافوها وعاشوها. التمثيل فيه فى منتهى العظمة.
*****
لو تعرف أى مسلسلات تانية قصيرة قولنا عليها.
Comments