الليستة السابعة: أفلام كئيبة
- Mirna El Mahdy
- Jun 15, 2019
- 6 min read
لمحبي الكآبة، دى ليستة أفلام من genres مختلفة بين تاريخي ورومانسي ودرامي ورعب ولكن المشترك بينهم هو أن كلهم نهايتهم حزينة وهتخليك تقطع شرايينك.
1) Les Misérables (2012):
الفيلم اسمه البؤساء فطبيعي تبقى أحداثه ونهايته بؤس فى بؤس.
الفيلم مأخوذ عن رواية العالمي فيكتور هيجو وتم تنفيذه بشكل موسيقى ومع إنى مش من أكبر المعجبين بأفلام الـmusicals إلا أنه متنفذ بشكل جميل جداً وإيقاع مبهر وتمثيل فوق العبقري.
الفيلم بيتكلم عن فترة ما بعد الثورة الفرنسية فى القرن التاسع عشر والتيار السياسي الفاسد اللى ركب الثورة وقتها وخد الحكم وحطم آمال كل الشباب الثوري وخلى الوضع يتحول من سئ لأسوأ.
الخطوط والشخصيات متنوعة ومرسومة بدقة ولكن الشئ المشترك بين كل الخطوط دي هى النهاية البائسة!
2) The boy in the striped pajamas (2008):
نهاية كئيبة غير متوقعة بالمرة!
القصة بتدور فى توقيت الحرب العالمية التانية فى ألمانيا، عن طفل اسمه برونو عمره 8 سنين بينتقل مع عائلته بسبب أن والده -الظابط فى الجيش النازي تم نقل خدمته للقرية اللى أقيمت فيها معتقلات اليهود.
بعد ما بيستقروا فى البيت الجديد، بيحس برونو بالملل الشديد وبيفضل يتمشى لحد ما يوصل للسلك الشائك اللى بيلف حوالين اليهود المساجين في المعتقل وهناك بيتعرف على الطفل اليهودي "شمول" وبتبدأ بينهم صداقة بتنتهى نهاية حقيقي توجع القلب.
3) The Pianist (2002):
هو فيلم عبقري خد تلاتة أوسكارز ده غير جوايز تانية كتير استحقها عن جدارة ولكن من كتر الكآبة والحزن اللى فيه أنا حقيقي ماقدرتش أكمله، عيني جالها جفاف من كتر العياط.
القصة بتدور فى بولاندا أثناء الحرب العالمية الثانية عن عازف بيانو يهودي عيلته بتتعرض للعنصرية والاضطهاد مع دخول النازيين لبولاندا وسيطرتهم عليها وتبدأ سلسلة من الأحداث والمشاهد اللى تم تمثيلها وإخراجها بعقبرية ولكن بشكل يوجع القلب وتقطع الشرايين حرفياً.
4) Schindler's List (1993):
استكمالاً لأفلام الحرب العالمية الثانية البائسة، ده من أبأسهم بداية من أن الفيلم كله معمول أبيض وأسود ومدته 3 ساعات من الكآبة المستمرة ولكن أحداثه قوية ومبني على قصة حقيقية بالكامل.
الفيلم خد 7 أوسكارز وتقريباً ده أحسن فيلم لليام نيسون.
لما نقول حرب عالمية تانية لازم نتكلم عن النازية، الفيلم عن رجل الأعمال أوسكار تشاندلير اللى أستغل الحرب النازية عشان اليهود يشتغلوا عنده كعمالة رخيصة هتزود أرباحه بس لما الحرب تشتد وتبدأ محارق ومذابح الهولوكوست بينمو عند تشاندلز شعور التعاطف مع محنة اليهود وبيقرر يعمل قائمة باليهود اللى بيشتغلوا عنده ويرشي الحكومة النازية عشان ينقذ حياتهم من الموت.
5) The Book Thief (2013):
آخر فيلم عن الحرب العالمية التانية فى الليستة دي وطبعاً نهايته حزينة.
قصته عن ألمانيا فى فترة الحرب النازية وعن بنت أهلها شيوعيين فأضطروا يعرضوها للتبنى عشان مايبقاش مصيرها نفس مصيرهم فيتبناها راجل بيعشق القراية وبتبدأ تغرق فى عالم الكتب بينما العالم فى حرب عنفية حواليها إلى أن يلجأ لعيلتها الجديدة شاب يهودي حرب من محارق الهولوكوست وطلب يستخبى عندهم فتنشأ بينهم علاقة قوية يجمع بينهم حبهم للقراية إلى أن تقابلهم النهاية المفجعة.
الفكرة الأساسية فى الفيلم هى الموت ولكن من زواية مختلفة وبشكل فلسفي.
6) Pay it forward (2000):
الفيلم ده خدعة!
أول ما تتفرج عليه هتحس ببهجة وسعادة بس كل ده هيطلع على دماغك فى النهاية وهتتنكد نكد لا يعلى عليه.
الفيلم عن طفل قرر يخلق نظام اجتماعي عن طريق أن كل ما حد يعمله حاجة كويسة هو يرد الحاجة دى لحد غيره وغيره يرد الجميل لحد غريب وهكذا عشان تفضل الدايرة مستمرة وكل أفراد المجتمع بطبقاته يخدموا بعض كدة لله فى لله إلى أن يقرر المخرج وسيناريست ينكدوا علينا حياتنا ويحطوا نهاية أنا فى رأيي أنها غير موفقة وغير مبررة بالمرة.
7) My sister's keeper (2009):
فيلم فيه plot twist بنت لذين ونهايته كلها عياط.
الفيلم بيدور عن أخت بتتربع لأختها الكبيرة بالنخاع الشوكي من وهى صغيرة بشكل متواصل ومستمر لأن أختها مصابة بالسرطان فى العمود الفقري إلى أن الأخت بتقرر ترفع قضية على عيلتها عشان يبطلوا يجبروها على التبرع بنخاعها لأختها لأن ده بيأذيها صحياً وبيحصل غصباً عنها.
طول الوقت هتبقى فاكر إنك فاهم الشخصيات ونواياها كويس إلى أن تتفاجئ بالـplot twist.
ده أقوى فيلم لكاميرون دياز حقيقي أبدعت فيه وتقمصت دور الأم بشكل غير متوقع.
8) One flew over the cuckoo's nest (1975):
تم اقتباس الفيلم ده في مصر وأتعمل مسلسل بطولة عادل إمام اسمه "أحلام الفتى الطائر".
القصة عن النصاب راندل باتريك ماكمفري اللى بيدعى الجنون فبيتم نقله لمستشفى الأمراض العقلية لتقييم وتحديد إن كان هيقضى عقوبته فى المستشفى ولا فى السجن على أساس أنه كدة بيخفف على نفسه العقوبة، بس اللى ماكانش عامل حسابه أنه بيرمى نفسه فى التهلكة وبيمضى شهادة وفاته بإيده لأن اللى هيشوفه فى المستشفى لا يمكن يخطر على بال حد وبعد ما يقدموا لك أمل أن الواقع ممكن يتغير بينتهى الفيلم نهاية محزنة جداً.
9) Se7en (1995):
نهايته صايعة وتوجع القلب!
كيفين سبيسي قاتل متسلسل بيقتل ضحاياه بناءاً على ارتكابهم للخطايا الإنجيلية السبعة فبيبدأ يمسك القضايا دى المحقق ويليام سومرست وزميله الجديد ديفيد الميلز الشاب اللى أتنقل للمقاطعة دى موخراً مع مراته الحامل وتستمر التحقيقات لحد ما يوصلوا للقاتل ولكنه كان محضر لهم مصيبة غير متوقعة.
10) Shutter Island (2010):
نهايته مفتوحة لتخمينك الشخصي وبتحطك قدام تخمنين كل تخمين فيهم أحزن من اللي قبله.
القصة عن المارشيل تيدي دانيلز اللي بيبدأ يشتغل فى قضايا جنائية بعد ما أنهى خدمته فى الجيش أثناء الحرب العالمية التانية فبيحقق في قضية هروب قاتلة مختلة عقلياً من مستشفى آشكليف للأمراض العقلية بمساعدة زميله الجديد فى العمل.
بمجرد دخوله المستشفى بتبدأ سلسلة من الأحداث الخطيرة اللى بتكشف له أن طاقم الأطباء والعلماء فى المستشفى دي بيجروا تجارب بشعة على المرضى ولكن السؤال اللى هيفضل يطاردك طول ما بتتفرج على الفيلم، هل كل اللى بيحصل حوالين تيدي ده حقيقي ولا نسج خياله بسبب الضغوطات والمآسي اللى أتعرض لها أثناء وبعد الحرب؟
11) Léon: The Professional (1994):
نهاية حزينة ولكنها منطقية وأحداث بائسة ولكنها واقعية.
الفيلم ده تم تصنيفه كواحد من أفضل 100 فيلم فى تاريخ السينما.
القصة بتدور عن ماتيلدا المراهقة اللى بتعاني من العنف المنزلي من أبوها ومراته وعن جارها ليون اللى بيعاملها بعطف إلى أن تتشقلب الظروف والمواقف وتكتشف ماتيلدا أن جارهم الوحيد اللى بيعاملها كويس هو قاتل مأجور.
وبتبدأ سلسلة من الأحداث المثيرة اللى بتربط بين البطلين إلى أن تنتهى نهاية مأساوية.
12) The Green Mile (1999):
نهاية بتأكد لك أن الظلم هو سُنة الحياة.
القصة عن الظابط بول إيدجكوم اللى بيشتغل فى سجن المقاطعة اللى محبوس فيه جون كوفي اللى تم اتهامه ظلماً بالقتل بس كوفي مش شخص عادي ولا مجرد راجل ضخم طول وعرض، ده إنسان ربنا وهبه قوة خارقة تخليه يقدر يقتل ويقدر يشفي فى نفس الوقت.
كوفي بيرمز للبراءة والخير فى الفيلم إلا أن الأحداث بتبين لك أن البراءة والخير مالهمش مكان وسط الفساد اللى ملا الأرض.
13) The Mist (2007):
مأخوذ عن رواية إله النكد والسوداوية ستيفن كينج.
الفيلم تقريباً الناس كلها عارفة نهايته لأن هو ده الشئ الوحيد اللى شهر الفيلم اللى أحداثه كلها تقليدية زيه زى أى فيلم بيدمج بين الرعب والخيال العلمي ولكن النهاية مفجعة وهتفضل معلقة فى ذهنك طول عمرك.
القصة عن أسرة بتحاول تنجو بحايتها من غزو وحوش وكائنات غريبة والفيلم مش مرعب بقدر ما هو مفجع وكئيب.
14) American Beauty (1999):
عايز تعرى المجتمع الأمريكي المدعى المثالية وتعرفه على حقيقته؟ شوف الفيلم ده اللى أترشح ل8 أوسكارز وحاذ منهم على 5.
القصة عن رجل أمريكي طبيعى وعادي جداً بيعاني من الروتين والملل من حياته اليومية وبنبدأ نتعرف على نظرة مراته وبنته له إلى أن ينتقل جانبهم جارهم الجديد وتبدأ حياتهم تتغير وتنتهى القصة بشكل مأسوي ولكنه منطقي وواقعي جداً وبيعبر عن مدى نفاق وكذب المجتمع.
15) Me before you (2016):
ويل ترينور كان من أشهر المغامرين والشباب الأثرياء اللى بيحبوا السفر والمغامرات إلى أن يتعرض لحادث يصيبه بشلل كامل فى كل أجزاء جسمه عدا راسه.
مابيقدرش ويل يتقبل وضعه الصحي الجديد وبيمر بمحن ومآسي ومواقف مؤلمة وصعبة فبيقرر الانتحار ولكن بسبب إعاقته مابيقدرش حتى ينتحر فبتقرر والدته تعين "لويزا" كمساعدة له على أمل أنه ممكن يحبها ويصرف نظر عن فكرة الانتحار.
16) The Fault in our stars (2014):
يلا نعيط ونتشحتف يا شباب.
الفيلم عن اتنين مراهقين مصابين بالسرطان بيقعوا فى حب بعض وبتدور بينهم أحداث ومواقف رومانسية بيشوبها الخوف المستمر من إنتكاسة أحد الطرفين أو تعسر وضعهم الصحي وأول ما تبدأ تحس أن الدنيا خلاص هتضحك لهم، يجي الروائي John Green - اللي الفيلم مبني على روايته - ويقرر ينكد عليك حياتك.
17) Remember me (2010):
بعد وفاة أخو تايلور الكبير، بيدخل فى حالة اكتئاب وردود فعله الغير متزنة بسبب حالته النفسية بتوصله إلى أنه يعتدى على ظابط مفترى بس الظابط هياكله علقة موت فينمو شعور ورغبة بالانتقام عند تايلور من الظابط ده بس القدر يدفعه لأنه يكتشف أن بنت الظابط ده معاه فى الكلية فيقرر يرتبط بيها عشان يكسر قلبها ويبقى خد حقه من أبوها ولكن المواقف والأحداث هتخلى العلاقة دي تاخد منحنى مختلف إلى ينتهى نهاية مأسوية.
تقريباً الفيلم الوحيد اللى حبيت فيه تمثيل روبرت باتينسون.
18) Sweet November (2001):
سارة ونيلسون شخصيتين مختلفين تماماً ولكن الصدفة بتدفعهم لأنه يتعرفوا على بعض ويقعوا فى حب بعض وتدور بينهم أحداث ومواقف كلها رومانسية ولكن اللى نيلسون مش عارفه هو أن سارة مخبية عنه سر هيخلى نهاية علاقتهم نهاية مأساوية كئيبة.
19) Never let me go (2010):
مشكلتى مع الفيلم ده أن إيقاعه بطئ بشكل يكاد يصل لمرحلة الملل.
الفيلم عن صداقة 3 أطفال أيتام كبروا سوا فى مدرسة داخلية مثالية جداً ولكن بنتفاجئ بعد ما يكبروا وينضجوا ويبقوا شباب أن دي مش مدرسة وأنها مكان هيربط مستقبلهم بنهاية بشعة مستنية كل واحد فيهم.
الفيلم يتصنف كرومانسي درامي ولكن للأسف أحداثه مش مثيرة وده طبعاً من رأيي الشخصي في ناس كتير تانية حبته بس المهم أنه فى الليستة دي عشان نهايته كئيبة زى كل الأفلام اللى تم ترشيحهم.
لو عندكم أى ترشيحات لأفلام مشابهة، قولي عليهم فى الكومنتس.
Comments