"البوست الحداشر: عن "ركين سعد

حضارة البتراء أهدتنا #ركين_سعد، جمال عربي وروح ثائرة.

---

أول عمل شوفته لها كان مسلسل #سمرقند وقامت فيه بدور الأميرة أتون اللي أتباعت في سوق النخاسة وكنت منبهرة جداً بأزاي كانت متبهدلة ومتعذبة بس عيونها محافظة على كبرياءها الملكي ثم شوفت لها فيلم#3000ليلة وكنت هتجنن من روحها المتمردة وعيونها اللي كلها قوة وريأكشنات وشها المهيبة ثم كانت السعادة الكبيرة لما ست الكل كاملة أبو ذكري تقدم للدراما المصرية الممثلة الأردنية ركين سعد اللي خطفت قلوبنا في دور مليكة في مسلسل #واحة_الغروب ومين فينا ماتقهرش عليها وتبنى قضيتها وتفاعل مع أداءها بكل حواسه وكإن الدور كان مكتوب في الرواية عشانها مخصوص. وفي السنة اللي بعدها فاجئتنا بدور أنا ماتوقعتش أبداً أنها هتجيده بالدقة والروعة دي، لما أختارتها الأستاذة هالة خليل في دور أميرة في مسلسل #بالحجم_العائلي وكانت بالنسبة لي مبدعة بشكل صادم في أنها تجيد دور الست المصرية والأم العصبية والزوجة النكدية وأستحالة تفكر أنها مش مصرية بتفاصيل كلامها ونطقها ومخارج ألفاظها فكرتني بهند صبري ودور يسرية في #أحلى_الأوقات.

ركين عبقرية وأنا واثقة أنها هتوصل لنجومية وشعبية كبيرة لأنها مجتهدة وشاطرة وذكية وأحنا محتاجين ده بشدة.

#غزل_عفيف 11