أزاى (2): أزاى تخلق قصة؟

أى قصة سواء (رواية، سيناريو، مسرحية، قصة قصيرة...إلخ) بتتبنى على 6 عناصر أو بمعنى أصح 6 إجابات على 6 أسئلة أساسية تخلى قصتك مبنية بشكل سليم.​

---

• السؤال الأول (What - أيه؟):

الأجابة عن السؤال ده بتمثل الفكرة أو الحبكة.

قصتك هتتكلم عن أيه؟ عن الحب؟ عن الخيانة؟ عن مغامرة فى عالم موازى؟

الفكرة هى بداية وأساس القصة وكل ما كانت واضحة كل ما كان تطورها أسرع وأحسن.

• السؤال التانى (Who - مين؟):

مين شخصيات قصتك.

مش بس البطل والبطلة، السؤال ده بيتضمن عدو البطل والشخصيات الثانوية وحتى الكومبارسات لأن الشخصيات لازم تاخد نفس الاهتمام والتفكير اللى الفكرة هتاخده وأكتر.

• السؤال التالت (Where - فين؟):

المكان اللى هتحصل فيه القصة.

فى دولة تانية ولا فى منطقة معينة ولا فى شركة أو مصنع ولا فى عالم موازى؟

لازم تبقى عارف المكان اللى هتدور فيه أحداث قصتك وتزوره لو تقدر أو تعمل ريسيرش كويس لأنك هتحتاج المعلومات دى أثناء وصفك للمكان فتخلى القارئ يحس أنه قاعد فيه.

• السؤال الرابع (When - أمتى؟):

الزمن اللى هتدور فيه أحداث قصتك.

هتبقى فى أنهى موسم مناخى؟ بليل ولا الصبح؟ فى زمننا ولا حقبة زمنية مختلفة وده طبعاً هيتطلب بحث محترم عن الحقبة دى وتكون ملم بكل الجوانب اللى أحداث قصتك هتلمسها.

• السؤال الخامس (Why - ليه؟):

ليه بتكتب القصة دى؟ أيه رسالتك أو هدفك من القصة؟

سكوت فيتزجيرلد بيقول:

"ماتكتبش عشان عايز تقول حاجة، أكتب عشان عندك حاجة تقولها".

يعنى لازم يكون عندك هدف أو رسالة أو حاجة عايز توصلها مش بتكتب عشان سوق الروايات يزيد رواية، وده الدافع اللى هيخليك تشتغل على قصتك وتميزها عن غيرها.

• السؤال السادس (How - أزاى؟):

أزاى هتقدم حكايتك؟ السؤال ده بيتضمن أسلوب تقديمك للقصة وده له كذا جانب:

الفئة: يعنى روايتك هتبقى رومانسى، بوليسى، خيال علمى...إلخ.

البناء: يعنى مسار الأحداث وتقسيمها بين بداية ووسط ونهاية.

الإيقاع: هتبدأ "كريشندو" من الأول للآخر ولا من الآخر للأول ولا "مدياس ريس" يعنى من النُص. هل إيقاع أحداثك بيبدأ سريع وبعدها بيبطأ تدريجياً ولا بيبدأ بطئ ثم بيسرع؟

السرد: هتستخدم ضمير المتكلم ولا الغائب ولا هتعملها كأن حد بيكتب مذكراته؟

الوصف: أسلوب نقل تخيلك للقارئ هو البصمة اللى المفروض تتميز بيها عن باقى الكتاب.

---

حط الأسئلة دى قدامك وجاوب عليها قبل ما تكتب قصتك والفترة الجاية هنتكلم عن كل عنصر من الستة دول بالتفصيل الممل.

الخميس الجاى هنتكلم عن أزاى تختار فكرة لقصتك، أشترك فى الـNewsletter عشان البوستات توصلك أول بأول ولو عندك أى أسئلة سيبها فى كومنت وهرد عليك فى أسرع وقت.

#فنالقصة