أزاى (5): أزاى تختار حبكة؟

العالم شاكب راكب مافيهوش غير 36 حبكة وأول قائمة بالحبكات دي كانت للكاتب المسرحى الإيطالى "كارلو جوتزى" فى القرن الثامن عشر وتطورت القايمة لحد ما وصلت لشكلها النهائى فى القرن التاسع عشر على يد الكاتب الفرنسى "جورج بولتى".

بس قبل ما نتعرف على أنواع الحبكات...هو أصلاً يعنى أيه حبكة؟

---

"الحبكة هى سلسلة من الأحداث المتواصلة بتقوم فيها الشخصية الرئيسية بالسعى لتحقيق هدف معين".

* ملحوظة: أنا هعرض الحبكات فى شكل فئات وبترتيب مختلف عن ترتيب "بولتى" لتسهيل الفهم.

• حبكات رومانسية:

1) عقبات ضد الحب (اتنين بيحبوا بعض بس الظروف ضدهم) زى: رواية رد قلبى.

2) فقدان الأحبة (تراجيديا تنتهى بموت الحبيب) زى: فيلم حبيبى دائماً ورواية The fault in our stars.

3) الغيرة الظالمة (شخص يشك فى حبيبه ويظلمه) زى: مسرحية عطيل ورواية 313.

4) التضحية بالذات للحبيب (شخص يعرض نفسه للموت من أجل حبه) زى: قصة أنطونيو وكليوباترا.

5) التضحية بشئ من أجل الحب (التضحية بشئ مهم ليستمر حبه) زى: رواية Landline وفيلم تيمور وشفيقة.

6) آثام الحب اللا إرادية (شخص معمى بالحب فيرتكب جرائم فادحة من أجل حبه) زى: مسرحية أوديب.

7) الخيانة القاتلة (خيانة غرامية تؤدى لقتل أحد) زى: مسلسل سقوط حر وفيلم غرام الأفاعى.

8) الخيانة (حبكة مافيهاش قتل ولكن بتعرض خيانة مبررة أو غير مبررة) زى: مسلسل العشق الممنوع.

9) آثام فى سبيل الحب (علاقة ضد الطبيعة أو الدين أو المجتمع) زى: فيلم العذراء والشعر الأبيض.

• حبكات اجتماعية:

10) الندم (شخص أخطأ وبيحاول يكفر عن ذنبه) زى: مسرحية الملك لير وفيلم Seven pounds.

11) الطموح (شخص يسعى لتحقيق طموحه بطرق مشروعة) زى فيلم النمر الأسود وThe pursuit of happyness.

12) التوسل والرجاء (التوسل للحصول على شئ تتمناه) زى: فيلم ورواية The wizard of Oz.

13) الكسب (التفاوض لتحقيق هدفاً ما) زى: رواية محامى الشيطان وفيلم The wolf of wall street.

14) ضحية سوء الحظ (حدث قوى يجعل البطل تعيساً) زى: فيلم Cast away ورواية Thirteen reasons why.

15) التضحية بالذات (شخص بيضحى بنفسه لهدف نبيل) زى: قصة The Nightingale وفيلم I am legend.

16) التضحية بالآخرين (التضحية بشخص لغرض ضرورى) زى: رواية لا تسألنى من أنا وفيلم الجراج.

17) العار (شخص أرتكب فعل جلب العار لعائلته) زى: فيلم دعاء الكراوان ورواية The Scarlet letter.

18) الحكم الخاطئ (حكم قضائى يؤدى لظلم شخص) زى: رواية The Count of Monte-Cristo.

19) عودة المفقود (تركز الحبكة على رحلة المفقود وليس الباحث عنه) زى: فيلم Baby day out.

• حبكات الصراع والعداء:

20) صراع القوي والضعيف (شخص ضعيف يتغلب عـلى من أقوى منه) زى: فيلم Rocky وفيلم الحاسة السابعة.

21) الثورة (التمرد على المجتمع أو السلطة) زى: رواية يوتوبيا ورواية Fight Club وفيلم The Matrix.

22) العداء الأسرى (عداء شرس لسبب مادى) زى: رواية الأخوة الأعداء لنيكوس كازانتزاكيس.

23) التنافس الأسرى (تنافس أو كره سببه الغيرة فقط) زى: رواية Jinx وقصة سندريلا.

24) قتل القريب بالخطأ (حد بيقتل قريبه بدون ما يعرف صلة قرابتهم) زى: فيلم الباطنية.

25) العدو الحبيب (تحول الأعداء لأحبة) زى: مسرحية روميو وجولييت وفيلم The proposal.

26) الصراع الإلهى : وده بيكون له نوعين:

أ) الواقعى (صراع داخلى بين رغبات الإنسان والدين) زى: رواية قواعد العشق الأربعون.

ب) الخيالى (يظهر فيه الآلهة كأشخاص يحاربون أنساناً فانياً) زى: أسطورة الأوديسة وفيلم Thor.

• حبكات الإثارة والتشويق:

27) الخلاص (بطل خارق ينقذ الجميع من الخطر) زى كل أفلام الأبطال الخارقين: سوبرمان، سبايدرمان...إلخ.

28) المطاردة (ملاحقة متهم هارب قد يكون مظلوماً أو مذنباً) زى: فيلم اغتيال وأبو على ومسلسل الهروب.

29) الكارثة (يعرض نهاية العالم لأسباب طبيعية أو خارقة) زى: فيلم 2012 أو رواية The host.

30) المغامرة (مجموعة من الشجعان يخوضون مغامرة خطيرة) زى: رواية Lord of the rings.

31) الاختطاف (البطل يسعى لاسترداد شخص مخطوف) زى: فيلم Taken وAbduction.

32) اللغز (جريمة ما بنتبع الأدلة لحلها) زى: روايات أجاثا كريستى وجورج سيمنون وآرثر كونان دويل وغيوم ميسو وموريس لوبلان.

33) الجنون (شخص مختل يشكل خطراً على حياة الآخرين) زى: مسلسل 30 يوم وشخصية الجوكر فى باتمان ورواية دون كيخوتي.

34) الحماقة الفادحة (خطأ فردى متهور أدى لكارثة) زى: أسطورة الطروادة وقصة حرب البسوس.

35) القصاص من المجرم (قد يكون عقاباً سماوياً أو بشرياً) زى: رواية الجريمة والعقاب وفيلم المصلحة.

36) انتقام الأقارب (شخص بينتقم من أحد أفراد العائلة لأنه أذى فرداً آخراً من العائلة...عروستى؟!)

يعنى ببساطة، مسرحية هاملت هى أوضح الأمثلة للحبكة دى:

كلوديس (عم هاملت) قتل أخوه (والد هاملت) عشان يصبح ملكاً فيقوم هاملت بالانتقام لدم أبيه من عمه.

---

كل قصة (رواية، فيلم، مسلسل أو مسرحية) لها حبكة رئيسية واحدة من ال36 واللى بيميز العمل هو طريقة عرض الحبكة وأشكال الصراع والشخصيات والحبكات ثانوية اللى بتدعمها.

الخميس الجَى هنتكلم عن الحبكة الثانوية وأزاى نوظفها بشكل يدعم الحبكة الرئيسية.

لو عندك أسئلة عن الحبكة سيبها فى كومنت وأشترك فى الـNewsletter عشان تصلك كل المقالات أول بأول.

#الحبكة