أزاى (7): أزاى تكتب حبكة ثانوية؟

الحبكة الثانوية(Subplot) هى قطع البازل اللى بتملى الفراغات والأحداث اللى بترسمها الحبكة الرئيسية.

وبناءاً على أسئلتكم، هتكلم الأسبوع ده عن معنى وأهمية وكيفية استخدام الحبكات الثانوية فى قصة (فيلمك، روايتك، مسلسلك أو مسرحيتك) وبالأمثلة.

---

تعريف الحبكة الثانوية:

"الحبكة الثانوية هى حبكات صغيرة مترابطة تنقل البطل من نقطة الصفر إلى ذروة الحدث".

بمعنى أصح، إذا كانت الحبكة الرئيسية هى مجموعة من الأحداث المتسلسلة اللى البطل بيحاول يوصل فيها لتحقيق هدفاً ما، فالحبكات الثانوية هى مجموعة الأحداث دى.

أهمية الحبكة الثانوية:

1) تطوير وسط القصة.

وفقاً لبنية القصة المكونة من 3 فصول (بداية، وسط، نهاية) فالغرض من البداية هو توضيح الهدف الأساسى للبطل والنهاية هى نجاح أو فشل البطل فى تحقيق هدفه أما الوسط فهو سلسلة من الحبكات الثانوية اللى بتمثل العوائق أو التسهيلات اللى البطل بيقابلها للوصول لهدفه.

2) إظهار جوانب مختلفة للشخصيات.

الحبكات الثانوية ممكن تبقى مواقف تساعدنا أكتر على التعرف على سلوك وبناء الشخصيات وطريقة تفاعلهم مع العالم المحيط بهم.

كيفية استخدام الحبكة الثانوية:

كلما كبر حجم العمل زاد عدد حبكاته الثانوية ففى الرواية كل فصل بيمثل حبكة ثانوية وكل حلقة فى المسلسل بتمثل حبكة ثانوية وهكذا، مافيش حدود لاستخدام عدد الحبكات الثانوية طالما:

1) لا تخلخل توازن بناء القصة.

2) تساعد على تقدم أحداث القصة وليس تأخرها.

3) ليست أشمل أو أعم من الحبكة الرئيسية نفسها.

4) عددها يناسب حجم قصتك ولا يؤدى لتشتت القارئ أو المشاهد.

مثال على الحبكات الثانوية:

على ما أعتقد أن كل اللى بيقروا المقالة دى شافوا كارتون "سيمبا". كتاب قصة الفيلم أختاروا "انتقام الأقارب" كحبكة رئيسية بحيث أن "سيمبا" الأسد بيسترد عرشه وبينتقم من عمه "سكار" لأنه قتل أبيه "موفاسا".

نيجى بقى للحبكات الثانوية اللى بتخدم وبتطور حبكة الكارتون الرئيسية زى:

1) العداء بين الأسود والضباع.

2) إقناع "سكار" لـ"سيمبا" بأنه يهرب من "أرض العزة" بعد ما أوهمه أنه السبب فى موت أبوه.

3) تعرف "سيمبا" على "تيمون وبومبا".

4) تاريخ الشخصيتين "تيمون وبومبا" وأسلوب حياتهم.

5) قصة حب "سيمبا" و"نالا".

كل دى حبكات ثانوية غلفت أحداث القصة وساعدت على تطورها ودفعها للأمام بشكل سلس وبدون ما تطغى على الحبكة الرئيسية أو تبوظ توازنها.

---

الأسبوع الجاى هنتكلم أكتر عن الفرق بين الحبكة الرئيسية والثانوية وأزاى نحافظ عن التوازن الدقيق بينهم.

لو عندك أى استفسار عن اختيار وكتابة الحبكات الثانوية، سيبه فى كومنت وهرد عليك فى أسرع وقت وأشترك فى الـNewsletter عشان كل المقالات توصلك أول بأول.

#الحبكة