أزاى (4): أزاى تلاقى وقت للكتابة؟
- Mirna El Mahdy
- Nov 20, 2017
- 2 min read
Updated: Mar 3, 2021
- أنت ليه ما بتكتبش؟
- ماعنديش وقت.
أكتر حجة الإنسان بيستخدمها عشان يبرر إهماله لموهبته أو هوايته المفضلة.
صحيح الواحد كل ما بيكبر مسئولياته بتزيد بس ماينفعش ضغوطات الحياة تحرمنا من حاجة بنحبها خصوصاً لو الحاجة دى ممكن تتحول من هواية لبصمة الكاتب بيسيبها فى مجتمعه.
الكتابة عضلة محتاجة تمرين عشان تقوى ولو ما مرنتش موهبتك ومارستها، عمرك ما هتنميها وعمرك ما هتاخد خطوة جدية. دول كام نصيحة مجربة من أشخاص بيدرسوا وبيشتغلوا وبردو بيعرفوا يخصصوا وقت لممارسة موهبتهم وتنميتها:
وفر ساعة من الشخروميت ساعة اللى بتقلب فيهم فى السوشيال ميديا وأكتب.
ممكن تفوت مسلسل أو فيلم وتستغل الساعة أو الاتنين دول فى الكتابة.
ممكن تنزل قبل ميعاد صحابك بساعة وتكتب فى الكافيه أو القهوة لحد ما يجوا.
ممكن تروَّح البيت ساعة بدرى عن صحابك أو عن قعدتك على القهوة وتكتب.
ممكن تأخر ميعاد نومك ساعة أو تبدر صحيانك ساعة تكتب فيهم.
ممكن تكتب فى المترو وأنت رايح الجامعة أو الشغل (لو مش بتتأثر بالدوشة).
ممكن تكتب وأنت فى الباص اللى بيلف حول الكرة الأرضية لحد ما توصل المدرسة أو الجامعة أو الشغل أو ترجع البيت (بردو لو مش بتتأثر بالدوشة).
لو تركيزك ضعيف أختار مكان مريح ومناسب للكتابة (أوضتك أو مكتبة...إلخ).
أكتب أفكارك فى نوتبوك، كدة هتوفر وقت التتنيح بتاع هكتب أيه النهاردة.
ممكن تكتب وأنت متزنب مستنى الولاد يخلصوا التمرين.
ممكن تكتبى والأكل على النار.
ممكن تكتب فى الساعة بتاعت القيلولة اليومية اللى مالهاش أى ستين لازمة.
لو قفلت أوى يعني، ممكن ما تكتبش طول الأسبوع بس تكتب كتير فى الويك إند.
ماعنديش نصايح تانية بس ماحبتش البوست يقفل برقم 13 (بتشاءم)!
فى النهاية، أحنا اللى بننظم الوقت مش هو اللى بينظمنا واللى واخد الكتابة جد ومخليها من أولوياته هيلاقيلها وقت مهما كان الوضع.
وأنت بقى، قولنا أزاى بتعرف توفر وقت للكتابة؟
الخميس الجاى هنتكلم عن أنواع الحبكات الدرامية وأزاى نطبقهم، لو عندك أى سؤال سيبه فى كومنت وأشترك فى الNewsletter وهتوصلك كل المقالات أول بأول.
Comments