أزاى (10): أزاى تعرض أحداث قصتك؟

أى قصة بتتكون من بداية ووسط ونهاية والمقصود بعرض القصة هو ترتيب تقديمك للأحداث للقارئ أو المشاهد.

فى المقالة دى، هنتعرف على 3 طرق مختلفة المؤلف بيستخدمهم عشان يبدأ حدوته.

---

عشان نفهم تطبيق الطرق التلاتة، هنتخيل أننا هنكتب قصة عن طالب جامعى اسمه أحمد رايح الامتحان وفى الطريق بيقابل شوية مشكلات بتعطله عن الوصول للجامعة.

• طريقة الـProlepsis - (من البداية للنهاية):

- هى الطريقة التقليدية اللى بتبدأ بعرض الشخصيات وتمهيد الأحداث وصولاً لذروة الحبكة.

- الطريقة دى بتسمح للقارئ أو المشاهد أنه يتعرف على شخصيات وأجواء القصة بالراحة وبالتفصيل وفى الأغلب، إيقاع الأحداث بيبقى "كريشندو" يعنى من الحدث الهادى للمثير.

- لو هنطبق الطريقة دى على القصة اللى فاتت، هنبدأ بإن أحمد بيصحى من النوم وبيلبس وبيجهز وينزل من البيت عشان يروح الجامعة وتستمر الأحداث لحد وصوله للامتحان.

• طريقة الـAnalepsis - (من النهاية للبداية):

- بتستخدم أكتر فى قصص الأكشن والسسبنس زى فيلم "حرب أطاليا، أولاد رزق".

- الطريقة دى بتشد انتباه القارئ أو المشاهد وتخليه مستعجل يعرف أيه اللى هيحصل وبتطبق عن طريق عرض مشهد من نهاية الحدث ونرجع نحكى البداية فى شكل فلاش باك ونمشى بشكل تصاعدى وصولاً لمشهد النهاية اللى بدأنا بيه.

- لو هنطبقها على القصة اللى فاتت، يبقى هنبدأ بأن أحمد خلاص وصل الجامعة وبقى فى لجنة الامتحان ونرجع فلاش باك نحكى من أول ما صحى من النوم ولبس وأستعد ينزل للجامعة.

• طريقة الـMedias Res - (من الوسط ثم البداية حتى النهاية):

- من الطرق اللى بتحتاج "صياعة" فى الكتابة وحسن استخدام للفلاش باك وتقسيم الأحداث كويس لأن فيه شعرة بين الطريقة دى وبين إن الأحداث تفرط منك وتشتت القارئ أو المشاهد.

من أفضل الأعمال اللى أتقدمت بالطريقة دى "ملحمة الألياذة".

- الطريقة دى بتبدأ بمشهد ذروة الحدث من نص القصة وبعدها فلاش باك نحكى به البداية ثم تمشى بشكل تصاعدى لحد المشهد اللى بدأنا بيه القصة ومن بعده تستمر الأحداث وصولاً للنهاية.

- لو هنطبقها على قصة أحمد، هنبدأ بمشهد له وهو فى الطريق محبوس فى الزحمة ثم نرجع فلاش باك وهو بيصحى وبيلبس وبيجهز عشان ينزل، وبعدها نبدأ نمشى بالأحداث لحد ما بقى محبوس فى الزحمة وبعدها نستمر من الزحمة لحد نهاية اللى هى أنه وصل الجامعة.

---

مش أى قصة ينفع تبدأ بأى طريقة من التلاتة ولذلك لازم تختار الطريقة المناسبة لنوعية قصتك وإيقاع وترتيب أحداثها.

حدد الطريقة المناسبة وأقرأ أو أتفرج على كذا عمل بدأ بالطريقة دى عشان تستفيد.

#فنالقصة