أزاى (6): أزاى تخلق شخصية؟
- Mirna El Mahdy
- Dec 7, 2017
- 2 min read
Updated: Mar 3, 2021
"على الكاتب أن يخلق أناساً أحياءاً وليس شخصيات، فالشخصيات للكاريكاتير".
من رأيى دى أهم نصيحة أداها إرنست هيمينجواى لأى كاتب بيخلق شخصيات لقصته.
أزاى تخلق شخصية حية بتنبض بين سطور قصتك؟ الموضوع محتاج عشر خطوات.
1) أدى لشخصيتك هدف أو دافع:
الشخصية محتاجة دافع يحركها والهدف بيتم تحديده من نوع حبكة قصتك بس المهم أن الهدف يكون قوى ومقنع ومناسب لنوع الشخصية اللى خلقتها والموقف اللى هتحطها فيه.
2) أخلق تاريخ للشخصية:
خلى لكل شخصية ماضى يناسب القصة ويفسر مخاوفها أو هدفها زى مثلاً بنت خايفة تقع فى الحب لأنها فشلت فى علاقة عاطفية سابقة أو حد بيخاف من السواقة لأنه أتعرض لحادثة وهو طفل وهكذا، تاريخ الشخصية بيبرر بناءها وتصرفاتها.
3) أخلق لشخصيتك صراع داخلي:
الصراع الداخلى بين مخاوف ورغبة الشخصية بيختلف حسب نوع الشخصية وهدفها وأفضل نموذج بيشرح الخوف المناسب لكل شخصية ذات هدف هو "نموذج جونغ للأثنى عشر شخصية".
4) أبعد عن الشخصيات المبتذلة:
"الكليشيه" هو عدو الكاتب، أنسى فكرة البطل اللى لابس أبيض والشرير اللى لابس أسود والمُزة اللى لابسة أحمر، سر خلق شخصية مميزة هو الابتعاد عن الشخصيات المتكررة والنمطية المعتادة.
5) أخلق شخصيات رمادية:
خلي للبطل عيوب ولعدوه مميزات، بالطريقة دى شخصياتك هتبقى مختلفة وأكثر واقعية ولكن الموضوع بيعتمد على اختيار العيب المناسب لكل شخصية ولذلك بقترح تقروا نظرية "تساعية علم النفس فى أنواع الشخصيات - The Enneagram of Character types".
6) أعمل بروفايل للشخصية:
من رأيى أليف شفق هى أفضل من ميز الشخصية بتفاصيلها خصوصاً فى رواية "لقيطة أسطنبول".
الكاتب لازم يعرف شخصياته زى كف إيده ويفكر فى تفاصيلها زى بتاكل أيه وبتحب أيه وبتكره أيه وهواياتها، ستايلها، برفانها، الموسيقى والأفلام والروايات اللى بتحبها ولونها المفضل...إلخ.
7) أوصفها بشكل مميز:
"شاب أسمر نحيف".
ده وصف عايم، المفروض الأول تذكر اللى بيميز الشخصية كالآتى:
"شاب عرف الشيب له طريقاً بالرغم من أنه بعشريناته ولكن نظارته السميكة والشامة التى تشبه البرقوقة بوجنته اليمنى ستجعلك تظنه معلم جغرافيا متقاعداً إلا أنه ليس سوى طالباً هزيلاً رث الهيئة بكلية الآداب".
ده وصف مميز وخلى القارئ يستنتج حاجات كتير عن شخصيتك فى سطر ونص بس.
8) عبر عن شخصيتك من خلال الحوار:
الكلام جزء من أى شخص وهوية شخصيتك هتأثر على طريقة كلامها مثلاً عندها لازمة، بتستخدم مصطلحات شبابية ولا كلامها متحفظ ولا بتقول مفردات أجنبية ولا بتردد أمثلة شعبية...إلخ.
9) شوف شخصيتك من عيون باقي الشخصيات:
جيب ورقة وقلم وأكتب الشخصيات الرئيسية المؤثرة فى قصتك وأبدأ شوف أيه رأى كل شخصية فى التانية، ده هيساعدنا نكتشف جوانب متعددة للشخصية الواحدة.
10) أخلق تفاعل بين شخصيتك ومحيطها:
أيه رأى شخصيتك فى شغلها؟ فى سكنها؟ فى عيلتها؟ فى وضعها الاقتصادى؟ فى البلد؟
كل ما كانت لشخصيتك وجهة نظر واضحة ومميزة كل ما كانت الشخصية نفسها متفاعلة ومميزة.
بناء الشخصية ممكن ياخد وقت أطول من بناء القصة والحبكة بس كل ما ركزت على شخصيتك وتوغلت فى تفاصيلها كل ما هتوصل لنتايج أفضل.
لو عندك أى أسئلة سيبها فى كومنت وهرد عليك فى أسرع وقت وأشترك فى الـNewsletter عشان كل المقالات توصلك أول بأول.
Commentaires