أزاى (9): أزاى تبنى قصتك؟

البناء هو تقسيم أحداث قصتك (سواء فيلم، رواية، مسلسل، قصة قصيرة، مسرحية...إلخ) والتقسيم اللى الكل بيتبعه هو تقسييم أرسطو المعروف عند العرب باسم "الأورغانون" اللى وضعه فى كتابه "فن الشعر" سنة 335 ق.م.

---

مبدئياً كدة، أى مؤلف لازم يقرا كتاب أرسطو "فن الشعر" (The poetics).

أرسطو جمع كل المسرحيات والقصائد الشعرية فى زمنه وتوصل لأن كلهم بيخضعوا لبنية الثلاثة فصول (The three acts structure) اللى بتتضمن (بداية - وسط - نهاية).

يعنى كل القصص اللى على وجه الخليقة حتى الأساطير والفلكلور الشعبى والقصص الدينية فى الكتب السماوية، بتعتمد على بنية الثلاثة فصول؟ أومال أيه اللى بيفرق عمل عن التانى؟

الفرق هو طريقة عرض الأحداث، فى ناس بتبدأ من النهاية وترجع فلاش باك للبداية وناس بتبدأ من الوسط وترجع للبداية ثم تستمر للنهاية وناس تانية بتمشى من البداية للنهاية وبالرغم من اختلاف تقديم الأحداث إلا أن البنية واحدة لا تتغير فخلونا نعرف أزاى تبنى قصتك.

بعد ما تختار الحبكة المناسبة لقصتك، هنبدأ نقسم أحداث الحبكة دى لبداية ووسط ونهاية.

• البداية:

- البداية من أهم أركان القصة لأن هى اللى بتخلى المشاهد أو القارئ يحكم إن كان العمل يستحق أنه يتابعه ويكمله للآخر ولا يسيبه ويشوف غيره.

- الغرض من البداية تقديم الشخصيات والأماكن وجذب القارئ أو المشاهد.

- بنهاية البداية المفروض يكون تم توضيح الهدف اللى البطل هيسعى لتحقيقه طول القصة.

• الوسط:

- الوسط بيعتمد على الحبكات الثانوية (subplots) وبيمثل رحلة البطل وسعيه نحو هدفه.

- خلال الوسط بنصل لذروة الحدث (climax) وبنراقب البطل وهو بيواجه عواقب وبيقابل تسهيلات وبيتعرف على شخصيات ثانوية أخرى.

- بعد ذروة الحدث بتهدأ الأحداث تدريجياً وبنكاد نصل للهدف.

• النهاية:

- النهاية تمثل نجاح أو فشل البطل فى الوصول لهدفه المنشود من بداية القصة.

- النهاية لازم تكون مناسبة لنوع الفيلم وحبكته يعنى ماينفعش فيلم كوميدى والناس ميتة ضحك تبقى فجأة نهايته مأساوية فاجعة ولازم تكون على نفس متسوى وقوة الأحداث.

- النهاية ممكن تبقى مفتوحة متروكة للمشاهد أو القارئ خاصة لو بتمهد لجزء تانى من الفيلم أو رواية، أو نهاية مقفولة بتقدم الحل النهائى للقصة ويجب أن تكن النهاية بنفس قوة البداية.

---

الخميس الجاى هنتكلم عن الطرق المختلفة لعرض أحداث قصتك وأزاى تبدأ فيلمك أو روايتك بشكل مميز ومناسب للحبكة.

لو عندك أى سؤال عن بناء القصة، سيبه فى كومنت وهرد عليك وأشترك فى الـNewsletter عشان توصلك كل المقالات أول بأول.

#فنالقصة