أزاى (3): أزاى يجيلك الوحى؟
- Mirna El Mahdy
- Nov 16, 2017
- 2 min read
Updated: Mar 3, 2021
الوحى هو الشرارة اللى هتخلق بيها قصتك وهو الفكرة اللى هتتحول لقصة متكاملة العناصر.
الكاتب له حالتين، يإما جَتله فكرة جهنمية قرر يحولها لقصة، يإما نفسه يكتب بس مش لاقى فكرة مناسبة، طب يعمل أيه؟ يستنى الوحى؟
لأ طبعاً، جيه كيه رولينج بتقول:
"الكاتب لازم يتعامل مع الكتابة كأنها مهنة زى السباك، مافيش سباك هيقولك أنا مش هشتغل عشان مجاليش الوحى".
وجاك لندن له مقولة بتقول:
"ما تستناش الإلهام، أجري وراه بهرواة".
يعنى من الآخر ماتستناش التفاحة تقع على دماغك عشان تلاقى الفكرة، لازم أنت اللى تسعى لها ودول شوية خطوات هيساعدوك تلاقى الفكرة المناسبة لقصتك:
حدد نوع قصتك وشوف نفسك شاطر فى أي لون (رومانسى، بوليسى، رعب...إلخ).
دوّر على الإنترنت أو أشترى مراجع عن أسس واستراتيجيات كتابة اللون ده.
أقرأ روايات وشوف أفلام كتير فى الفئة دى عشان تتعلم من باقى الكتاب.
أقرأ عن مواضيع ذات صلة باللون ده (مثلاً لو بوليسى أقرأ عن حوادث قتل، لو رعب دوّر على قصص بيوت حقيقة مسكونة أو حوادث غامضة...إلخ).
ضيّق بحثك تدريجياً من العام للخاص لحد ما تختار موضوع شدك وحاسس أنه مناسب.
أجمع كل المعلومات الممكنة والموثوقة عن الموضوع ده وأكتبها بدقة فى نوتبوك، ما تعتمدش على ذاكرتك.
أختار جانب من الموضوع وأعمل له زووم وفككه حتة حتة عشان تحوله بعدين لحبكة.
خلى عينك تشوف أدق التفاصيل عشان تبقى مُلم بكل جوانب الموضوع اللى هتكتب عنه.
جمع أسئلتك وأعرضها على مختص (لو هتكتب عن مرض أسأل طبيب، لو عن رياضة أسأل حد بيمارسها) كمان الجروبات والمنتديات هتساعدك تشوف آراء مختلفة للموضوع.
أكتب فكرتك فى سطر أو اتنين (مثلاً فكرة هارى بوتر هى: طفل يكتشف أن لديه قدرات سحرية فيلتحق بمدرسة لتعليم فنون السحر - فكرة توايلايت: مراهقة تغرم بشاب وتكتشف أنه مصاص دماء) كدة هتشوف فكرتك ينفع تبقى قصة مميزة ولا لأ.
* نصيحة: لما فكرتك تبقى جاهزة ما تعرضهاش على أى حد لتلات أسباب:
1) يمكن اللى قدامك بيعزك زيادة فيمدحك حتى لو فكرتك وحشة وتاخد ألم فى نفسك.
2) يمكن اللى قدامك بيكرهك فيحبطك خصوصاً لو كنت من اللى بيتأثروا بآراء الآخرين.
3) يمكن اللى قدامك حرامي ويسرق فكرتك (حصلت معايا شخصياً) ومجهودك يروح فى الأرض.
تطبيق الخطوات دى ممكن ياخد أيام، شهور أو أكتر حسب التزامك وسرعة تفكيرك وتوفر وسائل البحث بالنسبة لك بس المفروض مع آخر خطوة تكون وصلت لفكرتك.
الخميس الجَى هنتكلم عن أزاى تختار حبكة مناسبة لنوع قصتك .
لو عندك أى سؤال سيبه فى كومنت وأشترك فى الـNewsletter عشان توصلك كل المقالات أول بأول.
Comments