أزاى (11): أزاى تختار لون لقصتك؟

المؤلف زى الممثل لازم يكون عنده تجدد وتنوع ويجرب ألوان (genres) مختلفة من الكتابة إلى أن يكتشف اللون المناسب واللى بيبدع فيه.

بس قبل ما تجرب الأنواع المختلفة، لازم الأول تتعرف عليها وتفهمها.

---

1) الرومانسى - Romance:

- لون بتندرج تحته حبكات كتير ولكن فكرته العامة هى بطل وبطلة بينهم قصة حب والقارئ منتظر نهاية الحب ده أيه وكل ما كانت العقبات فى طريقهم أقوى كل ما زاد تميز القصة.

- كاتب اللون الرومانسى لازم يجيد فن التشخيص (characterization) ويتفهم سيكولوجية البشر وعواطفهم ونظرة كل جنس للآخر فى المجتمع والزمن اللى القصة هتدور فيه.

- اللون ده بيلعب على العواطف، وهو أكتر الألوان المطلوبة فى الوطن العربى حالياً بسبب خشونة الأحداث اللى بيمر بيها وطننا ولذلك المشاهد أو القارئ بيجد فيه ملاذاً من همه.

- من أشهر كتاب السيناريو الرومانسى المعاصر "تامر حبيب" ومن الروائيين "محمد صادق".

2) الاجتماعى - Drama:

- هو أقدم الألوان سواء فى المسرح أو الرواية أو الأفلام، وهو بيطرح قضية اجتماعية بغرض تقديم حل للمشكلة أو الاكتفاء بعرضها على القارئ أو المشاهد وترك الحل له.

- اللون ده بيتطلب إلمام الكاتب بمشاكل المجتمع وطبقاته ويكون عنده إطلاع كافى على علم الاجتماع وديناميكيته.

- تقريباً ده أكثر لون مستخدم فى الأفلام والمسلسلات والروايات فى وطننا العربى.

- من ألمع كتاب السيناريو الاجتماعى المعاصر "وحيد حامد" ومن أهم الروائيين "إليف شفق".

3) البوليسى - Crime:

- هو من ضمن فئة الإثارة (Thriller) وهو من أكتر الألوان المفضلة بالنسبة لى لأنه بيفتح لك عدد لا نهائى من الحبكات اللى ممكن تستخدمها بمنتهى الحرية وبلا قيود.

- اللون ده بيعتمد على قدرتك على التركيز فى التفاصيل والإطلاع على علوم مختلفة حسب نوع الجريمة اللى هتقدمها يعنى مثلاً معلومات طبية أو كيميائية أو قانونية...إلخ.

- الأعمال السينمائية والروائية العربية الكويسة من اللون ده قليلة جداً وده لضعف الحبكات وكثرة الثغرات فيها مما يؤدى لنفور القارئ أو المشاهد أو أنه "يفقس" حل الجريمة فى أول الفيلم.

- ستظل "أجاثا كريستى" ملكة اللون ده إلى جانب الروائى البلجيكى "جورج سيمُنون".

4) الرعب - Horror:

- لون قائم على التلاعب بأعصاب الناس ومخاوفهم.

- قصته بتعتمد على التوتر والغموض فلو فيلم هيتطلب إمكانيات عالية فى المؤثرات البصرية والصوتية ولو رواية هيتطلب قدرة جبارة على الوصف والسرد.

- للأسف أفلام وروايات الرعب فى الوطن العربى لا توصف بغير الرديئة بسبب الحبكات المبتذلة والركيكة المتكررة ورخص الإمكانيات السينمائية.

- من أمهر كتاب روايات الرعب التى تحولت لأفلام هو "ستيفن كينج".

5) الخيال العلمى - Science fiction:

- لون قائم على تخيل المستقبل عن طريق التقدم العلمى والتكنولوجى.

- كتابه بيحتاجوا يواكبوا اللى بيدور فى العالم من تطور تكنولوجى يساعدهم على تخيل المستقبل بشكل معقول ومنطقى وعلمى.

- تقريباً اللون ده شبه نادر الوجود فى وطننا العربى لضعف الإمكانيات والمعلومات اللازمة.

- من أشهر روائيين هذا اللون "إيزاك أسيموف".

6) الفانتازيا - Fantasy:

- لون قائم على تخيل ما هو غير معقول وغير حقيقى وخيالى.

- كاتب الفانتازيا لازم يكون خياله خصب ويقدر يبنى حبكات ومغامرات مشوقة ويخلق شخصيات وكائنات خيالية جذابة.

- اللون ده قليل الوجود فى الوطن العربى وإذا وجد بيكون له طابع كوميدى زى فيلم "طاقية الإخفا" و"إسماعيل يس والمصباح السحرى" ومسلسل "الرجل العناب" بعكس جدية وقوة الأفلام دى فى هوليوود زى كل أفلام مارفل وThe hunger games وLord of the rings وغيرهم.

- من رأيى ستظل الروائية "جيه كيه رولينج" متربعة على عرش الفانتازيا بسلسلة هارى بوتر.

---

دى كانت نبذة عن أشهر الألوان الأدبية لفن القصة وكل لون بيندرج تحته مجموعة كبيرة من الحبكات المتنوعة والفئات الثانوية.

عشان تختار اللون المناسب ليك، لازم تقرا عنه كتير وتشوف نماذج له سواء أفلام أو روايات وتبدأ تجرب تكتب قصص قصيرة من النوع ده إلى أن تجد نفسك متمكن من لون معين فتبدأ تطوره وتركز عليه.

لو عندك أى سؤال عن ألوان القصة، سيبه فى كومنت وهرد عليك فى أسرع وقت وأشترك فى الـNewsletter عشان كل المقالات توصلك أول بأول.

#فنالقصة